SESYONISTA: LIGHT MOOD

Light ang mood ng ating mga Konsehal at Vice Mayor nitong nakaraang sesyon. Umulan lamang ng pagsang-ayon sa mga resolusyon at ordinansa na pinasa ng mga miyembro ng Sanggunian.

Unang binasa ay ang pinagsanib na resolusyon nila Konsehal Ruth Hernandez at Moises Morales patungkol sa Memorandum of Agreement sa refurbishment ng Rizal Statue sa loob ng bayan. Ito ay parte pa rin ng pagdidiwang sa ika-150 kaarawan n gating pambansang bayani na si Jose Rizal. Sumunod dito ay ang pagbabasa ng accreditation ng dalawang people’s organization sa loon n gating lungsod na ginawa ni Konsehal Lian Aldabe.

Sa pag-uumpisa ng taon ay kailangan ring ibigay ang budget n gating mga Sangguniang Barangay. Para sa unang pagbasa, pinasok na ang budget ng mga barangay ng Mabato, Tres, Prinza, Singko, Kuwatro at San Jose. Nasa ikalawang pagbasa na naman ang budget ng mga barangay ng Makiling, Parian, Lawa, Dos, Sais, Mapagong, Uwisan, Barandal at Palingon na aabot sa kabuuang mahigit tatlumpung milyung piso.

Muli namang nabanggit ang resolusyon patungkol sa utilization ng pasilidad ng City Hall para sa ating Calamba City Employees Multi-purpose Cooperative sa pamamagitan ni Konsehal Christian Niño Lajara. Matagal nang hiling ng kooperatiba na mahawakan nila ang kantina sa loob ng ating city hall. Pinasok rin nila Konsehal Morel Manaig at Juan Lazaro ang mga resolusyon patungkol sa pag-acquire ng lupa ng LCBA para sa ating City Government at pagbabalik sa puwesto kay Rosseler Rizal sa DILG, ayon sa pagkakasunod.

Mahabang pagbabasa naman ng mga Barangay Resolutions ang ginawa ni ABC President Saturnino Lajara kung saan karamihan ng ating mga konsehal ay nagkuwentuhan at biruan na lang habang nagsasalita si ABC Pres na nauwi pa sa “May I go out” joke ni Kon. Morales kay Vice Mayor Severino Lajara na pabiro ring sinagot ng Presiding Officer na hindi puwedeng mag-CR habang nasa sesyon. Tinuro naman nila Kon. Bong Baroro at Peewee Perez na nauna nang gumamit si Kon. Niño Lajara nang hindi nagpapaalam.

Dalawang barangay resolusyon mula sa Barangay Uwisan ang binasa na parehong patungkol sa pagpapalakas ng isports sa kanilang lugar. Una ay ang paghiling sa pasilidad kagaya ng covered court sa kanilang barangay at ang sumunod naman ay ang resolusyon para lumiham si Vice Mayor Binoy Lajara kay Senador Franklin Drilon para suportahan nito ang pagpapagawa ng covered court sa nasabing barangay.
Sa patuloy na pagrereklamo ng mga negosyante, mamamayan at mga turista sa sira-sirang mga kalsada sa Pansol, isang resolusyon muli ang kanilang inihain upang gawin agad ang kanilang mga kalsada lalo’t higit na papalapit na muli ang summer vacation. Sa Brgy. 5 naman humiling ang Sangguniang Baranggay ng mga jetmatic at poso dahil sa kahirapan ng pagkuha ng tubig sa ilang bahagi ng kanilang baranggay. No Parking Policy naman sa buong kahabaan ng Bañadero ang bagong pinatutupad na ordinansa sa nasabing baranggay. Pagkatapos ng gagawing committee hearing, bawal nang magparada ng kahit anong uri ng sasakyan sa buong Bañadero kasama na ang Sitio Nayon sa mga oras ng 6-8 at 10-11 ng umaga at mula ika-4 hanggang ika-8 ng gabi.

Isang kahilingan naman mula sa Calamba Upland Multi-purpose Farmers Cooperative ang binasa ni Kon. Morales upang tugunan ng Pamahaalang Panlungsod ang gastusn sa kanilang warehouse na nasa Brgy. Bunggo. Dagdag pa nila na sa apat na baranggay pa lamang ay nakakapagproduce na ng 319 thousand tons ng palay ang ating lungsod. Iminungkahi rin naman ni Kon. Morales na ilipat ang signage ng ating City Hall sa mismong building nito. Mapapansin na nasa saradong Main entrance gate ang nasabing signage kung saan hindi ito madaling mapansin ng mga tao. Sinang-ayunan naman ito ng lahat n gating mga konsehal.

Tanging si Kon. Niño Lajara naman ang nagbigay ng committee report kung saan binanggit niya na magkaroon ng koordinasyon ang POSO para matugunan kaagad ang matagal na at lalo pang lumalalang traffic sa Brgy. Mayapa. Ang ordinansa naman para magtanim ng puno ang bawat estudyante mula elementarya hanggang kolehiyo sa kanilang paaralan at komunidad na akda ni Kon. Bong Baroro para sa last reading.

Maganda ang mga mood ng ating Sangguniang Panlungsod sa mga nakalipas na public session. Kailan kaya nila muling tatalakayin ang mga mabibigat na isyu katulad ng relokasyon sa mga taga-riles, kurapsyon at ang mga serbisyong panlipunan sa Canlubang?

SESYONISTA: ANG MULING PAGPAPAKITA

Nag-aayos ako ng mga bagay-bagay sa loob ng city hall. Mga utos ni ina, ni ate, at ng kung sinu-sino nang malingat ako paakyat ng Session Hall ng Sangguniang Panlungsod at nakitang may nagaganap na public session ngayon. Late man ang pasok ko ay sinulit ko na ring magmasid at baka matagal ulit bago ito maulit.

Ilang buwan rin ang lumipas na laging closed door ang mga konsehal. Barangay resolutions na ang naabutan kong tinatalakay. Siguro panggitnang parte na iyon ng sesyon. Isang resolusyon mula sa Baranggay 4 ang binasa ni ABC Pres. Saturnino Lajara ukol sa pagrerequest ng pagsasaayos sa kalsada sa kahabaan ng Del Pilar. Pinuna rin ng ABC President ang mga proyektong pambaranggay na matagal ng nabinbin ngunit hindi pa rin naisama sa badyet ng panibagong taon. Mabilis namang kinuha ng Chairman ng Finance na si Konsehal Moises Morales ang responsibilidad at sinabing aayusin ang mga proyekto para maihabol sa badyet.

Isang rekomendasyon naman ang iminungkahi ni Kon. Morales para gawing bukas sa publiko ang mga pinag-usapan sa Executive-Legislative Agenda Meeting. Ito ay upang daw maging transparent sa mamamayan ang Pamahalaang Panlungsod patungkol sa mga proyekto nito.

Isang estudyante naman ng FEU-East Asia College na si Dan Lester Suelto ang binigyang pugay ni Konsehala Lian Aldabe. Ang nasabing estudyante ay nahirang na isa sa Jose Rizal Outstanding Student of the Philippines. Binigyan rin ng pagkakataon ng Presiding Officer Binoy Lajara na makapagsalita ang kabataan at makapagpasalamat. Tunay nga namang kahanga-hanga ang kabataang Calambeño. Pinagkalooban rin siya ng P20,000 ng Sangguniang Panlungsod na muntik pa maging P10,000 lamang ng may kumontrang konsehal.

Unang araw rin palang nakita ko ang bagong SK President Paco Nido na nakaupo sa isa sa mga silya ng ating mga Konsehal matapos niyang palitan si SK Jane Rizal. Kagaya ng huli, aktibo rin siya sa pagtaas ng kamay higit nga lang masmataas at kapansin-pansin di' gaya ng dati.

Mabalik tayo sa sesyon. Mainit ring pinag-usapan ang nangyaring insidente ng pamamaril at pagkamatay ng isang on-duty ng security guard sa Poblacion. Ito ay iniulat ni Konsehal Johnny Lazaro ngunit tila may bagabag ang ilang konsehal na maaaing hindi seguridad ang usapin dito kundi personal lamang. Marami rin namang umayon kay Konsehal Lazaro, partikular si Konsehala Ruth Hernandez. Nakiusap na lamang si Konsehal Christian Niño Lajara na pag-usapan na lang ang nasabing isyu sa isang committee hearing kasama ang Peace and Order Committee.

Hindi ko na naintindihan ang huling parte ng sesyon dahil ininterbyu ko saglit si Dan Mendoza, siya iyong nanalong estudyante ng Model Student. Basic lang naman ang tinanong ko at hindi ko na masyadong nilaliman dahil baka ilibre pa niya ako ng tanghalian kapag napahaba ang usapan. Pero hanga ako sa kanya dahil pagdating talaga ng kolehiyo ay mahirap ng tumanggap ng karangalan.

Sa susunod na Lunes, malamang babalik na naman ako sa bisyo ko ng paghihintay sa sesyon. Malay natin kung maisipan na nilang gawing regular ang public session. Once a week lang naman iyon at talagang hinihintay ng maraming tao. Sana madinig nila tayo at dumalas na ang kanilang pagpapakita, kung hindi nila kaya sa sesyon eh kahit sa kani-kanilang opisina na lang.

SESYONISTA: ANG PAGBABALIK

Matapos ang mahigit isang buwan ay ito at nagbabalik ang inyong sesyonista. Isang buwan rin mahigit ang dumaan mula nang magkaroon ng pampublikong sesyon ang ating mga lingkod bayan. Maikli lamang ang naging sesyon nitong Lunes subalit makabuluhan sa mga bagong isyu na binuksan.

Nagbalik na mula sa ilang buwan na pahinga si Konsehal Bong Baroro. Bago rin ang kanyang haircut. Pansin rin ang ibang kulay ng buhok ni Kon. Lian Aldabe. Si Konsehal Ruth Mariano-Hernandez naman ang tumayong Presiding Officer sa sesyon na iyon. Ito ang unang pagkakataon na hindi si Vice Mayor Binoy Lajara ang nag-preside sa session ngayon. Wala namang absent nan iba pang konsehal at kita rin naman na sinusulit na rin ni SK Jayne Rizal ang kanyang mga huling sesyon sa Sangguniang Panlungsod.

Bago mag-umpisa ang sesyon ay nagkaroon muna ng kaunting kodakan kasama ang national chess winner mula sa LCBA. Lahat naman ay game sa pagpapa-picture.Lahat naman ay nagulat at tumahimik sa malakas na pagpukpok ng gavel ni Madam Presiding Officer subalit natutunan niya rin namang pumalo ng mahinahon sa mga sumunod na pagpukpok nito.

Ilang mga Memorandum of Agreement ang binasa bilang mga resolusyon nila Konsehal Eddie Catindig at Morel Manaig. Naaprubahan na rin naman sa huling pagbasa ang resolusyon ni Konsehal Moises Morales patungkol sa pagpapalagay ng mga streeltlights sa mga Upland barangays. May karagdagang suhesityon sa resolusyong ito si Kon. Johnny Lazaro na tanggapin ang mga ibibigay na solar panel mula sa isang institusyon para higit na makatipid ang lungsod sa proyektong ito.

Iisa lang na barangay resolution mula sa Brgy. Punta ang binasa ni ABC Pres. Saturnino Lajara. Ito ay isang resolusyon upang bilihin ng lungsod ang lupang gagamitin nila para sa isang proyekton ng baranggay.

Isang sulat naman mula sa mga residente ng Brgy. San Jose ang binasa ni Kon. Manaig tungkol sa pagtutol ng mga ito sa mga ginagawang imprastraktura ng DSWD sa loob ng kanilang subdibisyon. Mabilis namang itong inirekomenda sa Social Service Chair Eddie Catindig para magkaroon ng pagpapupulong. Isang pasabog naman ang banat ni Kon. Bong Baroro sa kanyang pagbabalik. Ito ay ang pagkuwestiyon sa overstay ng ating OIC-City Treasurer Liberty Toledo at sa napakalaking overtime pay ng nasabing opisyal. Napag-alaman niyang sumuweldo ng P25,000 mula Oktubre 19-27 at P27,395 mula Sept. 19-27 para lamang sa kanyang overtime. Mabigat ang mga pagdududa ni Konsehal Baroro sa OIC-City Treasurer na totoong nag-oovertime ang nasabing opisyal. Wala rin naman daw dapat overtime pay ang nasabing opisyal. Tinawag niya ang pansin ng Department of Finance ukol sa nangyayaring overstaying ni OIC Treasurer.

Si Konsehal Moises Morales naman ay nagpasa rin ng isang resolusyon para sa unang pagbasa ukol sa Resettlement Program ng Lungsod. Siya rin ang huling nagsalita sa pamamagitan ng pagpapasa sa huling pagbasa ng ordinansa sa pag-amyenda ng General Welfare Code.

Mukhang magiging exciting pa rin ang mga isyu sa ating Sangguniang Panlungsod. Sana nga lang maging masmadalas na ang kanilang public session upang makita naman ng taumbayan na ang SP ng Calamba ay hindi patulug-tulog.